ક્ષિતિજો સ્વચ્છ રહે કેમ કરી જીવનની ? –
અપેક્ષાઓની આ વણઝારનો વિરામ નથી
– હેમન્ત દેસાઈ

પથ્થરો બોલે તો બોલાવી જુઓ,
શક્યતાના દ્વાર ખખડાવી જુઓ.
-શ્યામ સાધુ

પ્રેમની લાંબીલચક વ્યાખ્યા ન કર,
‘હું’ અને ‘તું’ એટલું કાફી નથી ?
-કિરણ ચૌહાણ

પાંડવો અને કૌરવો લડતા ભીતર
હુંજ જાણે યુધ્ધનુ મેદાન છું
-અહમદ મકરાણી

પેલા ખૂણે બેઠાછે તે સૈફ છે, મિત્રો જાણો છો?
કેવો ચંચળ જીવ હતો ને કેવા રમતારામ હતા?
-સૈફ પાલનપુરિ

પાનખરમાં પર્ણ પીળાં થાય છે,
એક સપનું આંખમાં મુરઝાય છે.
-બિસ્મિલ મન્સૂરી

ટેરવાં માગે છે તમને આટલું પૂછવા સજનવા
આંસુઓ સાથે અવાજો કઈ રીતે લૂછવા સજનવા
– મુકુલ ચોકસી

ટુકડે-ટુકડા થઈ ગયો તો પણ જીવું,
આયનાઓ દંગ છે મારી ભીતર.
-ડૉ. વિવેક મનહર ટેલર

ટાઢ-તડકો-વૃષ્ટિ હો કે પાનખર,
હર મિજાજી મોસમે ખીલ્યો છું હું.
-ડૉ.વિવેક મનહર ટેલર

તૂટી કલમ તો આગળીનાં ટેરવે લખ્યું,
તેથી જ રાતી ઝાંય છે મારા બયાનમા.
-ભગવતીકુમાર શર્મા

યાદના સૂરજ અચાનક માર્ગમાં ઊગી જશે
બસ પછી તો ભગ્યમાં ઝળહળ ગણી ચાલ્યા જશું
-હિતેન્દ્ર કારિયા

ઝાકળની જેમ શોભતા અશ્રુ વહનને પૂછ
કેવી વિરહની રાત હતી, મુજ નયનને પૂછ
-‘રસિક’ મેઘણી

ઝેર તો પગમાં સફરનું પણ હતું,
શિર ભલા ક્યા કારણે ફૂટ્યું ? સમજ !
-મહેન્દ્ર જોશી

ઝંખના આ વિશ્વમાં સ્થાયી થવાની છે દુ:ખદ,
થા અહીં મહેમાન તો તકલીફ જેવું કંઈ નથી.
– કિરીટ ગોસ્વામી

ઝાંઝરી પહેરીને નીકળી રાત્રિ જ્યાં આકાશમાં,
ત્યારથી આ પૃથ્વી પર લ્યો આટલું રણઝણ થયું.
– હસમુખ મઢીવાળા

ઝાંઝવાને જઇ કહો,
તું નથી, હું પણ નથી.
– સુધીર દવે

થોડું તારું, થોડું મારું કરિયેં સર્જન સહિયારું,
આમ અલગ ને આમ અડોઅડ ભમિયેં વનવન સહિયારું.
-પંચમ શુક્લ

થાકી ગયો તો ખૂબ કે ચાલી શકત ન હું,
સારું થયું કે લોક સહુ ઊંચકી ગયા મને.
– કૈલાસ પંડિત

થઈ શકે તો રૂબરૂ આવીને મળ
ઊંઘમાં આવીને ગોટાળા ન કર
-’ખલીલ’ ધનતેજવી

થાકીને અંતે આંગળા થીજી ગયાં બધાં
બંધાયો ક્યાં છતાંય તે આકાર શબ્દનો
-આદિલ મન્સૂરી

ચાલ ઇચ્છાઓ બધી ટૂકાવીએ
લાગણીઓને હજી ફૂલાવીએ
-ઉર્વી પંચાલ ‘ઉરુ’

ચોઘડિયાંઓ જોતો રહેશે,
માણસ તોયે રોતો રહેશે.
-ઉર્વી પંચાલ ‘ઉરુ’

જિંદગી ઉજાસ પણ રહી તો એ રહી‘રસિક’
આશ લઈને આંખમાં દીવડા ઠરી ગયા
-‘રસિક’ મેઘણી

જે નથી તારું તું એને પામવાના મોહમાં,
જે બધું તારું છે એ ત્યાગી મને ભરમાવ ના.
અશરફ ડબાવાલા

જ્યાં ઊભો હોઉં ત્યાં બરાબર છું
મૂકવું ક્યાં સ્વમાન જોખમમાં !
-ભરત વિંઝુડા

જુદા જુદા ધરમ મળે જુદા ખયાલ મળે,
નવાઈ છે કે સૌનું લોહી તો ય લાલ મળે.
-રાજેશ વ્યાસ ‘મિસ્કીન’

જ્યાં અર્થ અંધકારની ભીંતો ચણી રહ્યા
ત્યાં કેવી રીતે થઈ શકે વ્હેવાર શબ્દનો
-આદિલ મન્સૂરી

જીવન-ઉપાસનાની સદા ધૂન છે મને, હું જિંદગીનો એક નવો દૃષ્ટિકોણ છું
મારી વિચાર-જ્યોત મને માર્ગ આપશે, છું એકલવ્ય હું જ અને હું જ દ્રોણ છું
– મનહરલાલ ચોકસી

જીવતાં જે ભરોસો હતો ઈશ પર, એ મર્યા બાદ બેફામ સાચો પડ્યો,
જાત મારી ભલે ને તરાવી નહીં, લાશ મારી પરંતુ તરાવી દીધી.
-બરકત વિરાણી ‘બેફામ’

જેટલાછે મહેલ સૌ ભેટે ધરો,
સર છુપાવા એક ઘર માંગી જુઓ
-મોહમ્મદઅલી વફા

જે કદી યે શબ્દમાં આવે નહીં,
તે જ બિસ્મિલ મૌનમાં પડઘાય છે.
-બિસ્મિલ મન્સૂરી

ગુલાબી આંખની રંગીની શીશામાં નથી હોતી;
નજરમાં હોય છે મસ્તી તે મદિરામાં નથી હોતી.
-‘આસિમ’ રાંદેરી

ગમ્મે તેવું મોટું હો પણ,
નામ વગરની હોય નનામી.
-અંકિત ત્રિવેદી

ડૂબી જવાની પળને ડુબાડીશું આપણે,
પાણીમાં રહીને પાણીને પાણી બતાવશું.
-કિરણ ચૌહાણ

ડબોળો આંગળી એમાં નર્યું પોલાણ ભટકાશે,
વમળના અવતરણને તારવીને હાથમાં મૂકો
-સંજય પંડ્યા

ડર મને મારો જ થોડો હોય છે,
કાચમાં ચહેરાને જોવો હોય છે.
-ડૉ. ચિનુ મોદી ‘ઈર્શાદ’

ડૂમા, તરસ, તડપ ને કણસ સાક્ષી છે બધાં,
કોને કોને બોલાવું હું મારા બચાવમાં.
– આશ્લેષ ત્રિવેદી