"શેર અંતાક્ષરી" સંકલનઃ અબ્દુલ રઝાક "રસિક" મેઘાણી

ગુલાબી આંખની રંગીની શીશામાં નથી હોતી;
નજરમાં હોય છે મસ્તી તે મદિરામાં નથી હોતી.
-‘આસિમ’ રાંદેરી

ગમ્મે તેવું મોટું હો પણ,
નામ વગરની હોય નનામી.
-અંકિત ત્રિવેદી

ડૂબી જવાની પળને ડુબાડીશું આપણે,
પાણીમાં રહીને પાણીને પાણી બતાવશું.
-કિરણ ચૌહાણ

ડબોળો આંગળી એમાં નર્યું પોલાણ ભટકાશે,
વમળના અવતરણને તારવીને હાથમાં મૂકો
-સંજય પંડ્યા

ડર મને મારો જ થોડો હોય છે,
કાચમાં ચહેરાને જોવો હોય છે.
-ડૉ. ચિનુ મોદી ‘ઈર્શાદ’

ડૂમા, તરસ, તડપ ને કણસ સાક્ષી છે બધાં,
કોને કોને બોલાવું હું મારા બચાવમાં.
– આશ્લેષ ત્રિવેદી

બાગનો પર્યાય જો શોધી શકો તો શોધજો,
પર્ણ, ડાળી, ફૂલ, ઝાકળ ને પછી શું શું ગયું ?

બધે નામ સરનામું જાહેર ના કર,
જગતને પછી પુછવા આવવા દે-
-હેમેન શાહ

બસ, દુર્દશાનો એટલો આભાર હોય છે,
જેને મળું છું, મુજથી સમજદાર હોય છે.
-મરીઝ

બુંદની હસ્તીને અવલોકી જુઓ
સામટા સો સો પ્રલય વમળાય છે.
-અંજુમ ઉજિયાનવી

બેય આંખો સાવ કોરી રાખજે,
રોજ ઝાકળ રાતનાં આવે જ છે.
-ચિનુ મોદી ‘ઈર્શાદ’

બે કદમ વધે છે એ રોજ શ્વાસની સાથે,
મોત પણ સલામત છે, જિંદગીની છાયામાં.

– મનહરલાલ ચોક્સી

છોને કરોડો બુંદનો સંગ્રહ છલોછલ હોય એ,
દરિયો જશે જો ખેતરે, ઝાકળ કહેવાશે નહીં
-ઘનશ્યામ ઠક્કર

છે અજબ પ્રકારની જીંદગી, કહો એને પ્યાસી જીંદગી,
ન રહી શકાય જીવ્યા વિના, ન ટકી શકાય જીવન સુધી.
ગની દહીંવાલા