"શેર અંતાક્ષરી" સંકલનઃ અબ્દુલ રઝાક "રસિક" મેઘાણી

જીવનની સમી સાંજે મારે જખ્મોની યાદી જોવી’તી,
બહુ ઓછાં પાનાં જોઈ શકયો બહુ અંગત અંગત નામ હતાં.
-સૅફ પાલનપુરી

જિંદગીનો ત્યાં સુધી અજવાસ છે
આયખામાં જ્યાં સુધી બસ શ્વાસ છે
-ઉર્વીશ વસાવડા

જે શોધવામાં જિંદગી આખી પસાર થાય
ને એજ હોય પગની તળે એમ પણ બને
-મનોજ ખંડેરીયા

જયારે વિમાસણોના હતાં કાળાં વાદળો,
રસ્તો જ જાતે પહોંચી ગયો રાહબર સુધી
-મનહરલાલ ચોકસી

જીવવા માટે સતત છે દોડવાનું, એ જ તો વાંધો પડ્યો છે શ્વાસને
બંધ આંખે ચિત્ર આખું દોરવાનું, એ જ તો વાંધો પડ્યો છે શ્વાસને
-શૈલેષ પંડ્યા ‘ભીનાશ’

જિંદગીનાં રસને પીવામાં જલ્દી કરો “મરીઝ”
ઍકતો ઓછી મદિરા છે ને ગળતુ જામ છે
-મરીઝ

જો હ્રદયની આગ વધી ‘ગની’તો ખુદ ઇશ્વરે જ કૃપા કરી
કોઇ શ્વાસ બંધ કરી ગયુ કે પવન ન જાય અગન સુધી
-ગની દહીંવાલા.

જ્યાંજ્યાં નજર મારી ઠરે,યાદી ભરી ત્યાં આપની
આંસુ મહીંયે આંખથી યાદી ઝરે છે આપની
-સુરસિંહજી ગોહેલ ‘કલાપી’

જીવનનાં બધાં પાપ જે ધોઈ નાખે,
નયન પાસ એવું રૂદન માગવું છે !
– મુકબિલ કુરેશી

જમાનાના બધા પુણ્યો જમાનાને મુબારક હો,
હું પરખું પાપને મારા, મને એવા નયન દેજે !
– નાઝિર દેખૈયા

થોડીક શિકાયત કરવી’તી થોડાક ખુલાસા કરવા’તા,
ઓ મોત જરા રોકાઈ જતે બેચાર મને પણ કામ હતાં
-સૅફ પાલનપુરી

થોડુ તારા વિશે થોડુ મારા વિશે
એમ પૂછે બધા બે કિનારા વિશે
-કવિ રાવલ

થોડી ઠોકર થોડાં ફૂલો
સપનાનો અણસારો હો જી
-અઝીઝ ટંકારવી

થઈને ઉદાસ જોયુ જો ઉપર અમે ‘મરીઝ’
ત્યારે ખબર પડી કે ગગન પણ ઉદાસ છે
-મરીઝ

થાશે તકાદો એટલે ખાલી કરી જશું,
કીધો છે જેમાં વાસ, પરાયું મકાન છે.
– ‘અમર’ પાલનપુરી

થોડો વિચાર મારા વિશે પણ કરી લઉં,
ફુરસદ મને મળે જો તમારા વિચારથી.
– આદિલ મન્સૂરી

થાકીને સાંજ ટાણે ‘રસિક’ બેસવું પડયું
નહિતર વિરાટ રણ મહીં રસ્તા ઘણાં હતા
-‘રસિક’ મેઘાણી

થોડા ઝઘડા છે છતાં પરવા નથી,
આપણી વચ્ચે મહોબત ક્યાં નથી !
-કિરણ ચૌહાણ

થકાન, હાંફ, ને સપનાં વગરની સૂની નજર
તમામ દોડનો બસ આ નિચોડ ઉંદરડા.
-વિવેક કાણે ‘સહજ’

થોડા છાંટા ભેગા કરિયેં હેતલની મીઠી વાવે,
ના મારું ને ના તારું પણ એ છે અર્પણ સહિયારું.
-મુહમ્મદઅલી ભૈડુ’વફા’

તફાવત એ જ છે,તારા અને મારા વિષે,જાહિદ!
વિચારીને તું જીવે છે, હું જીવીને વિચારું છું
-અમૃત ઘાયલ

તમને ભુલી જવાના, પ્રયત્નોમા આજકાલ
તમને ભુલી ગયો છું, મને ખ્યાલ પણ નથી
-હરીન્દ્ર દવે

તમે પણ દુશ્મનો ચાલો અમારા સ્નેહી ઓ સાથે
એ કબ્રસ્તાનથી આગળ મને કયાં લઇ જવાના છે
-જલન માતરી

તેં કહ્યું ને મેં તરત માની લીધું, પણ કંઈ સમસ્યા દોસ્ત રસ્તામાં હતી
ઘર વગર સરનામું કાયમ શોધવાનું, એ જ તો વાંધો પડ્યો છે શ્વાસને
-શૈલેષ પંડ્યા ‘ભીનાશ’”

તમારી મહેફિલની એજ રંગત, તમારી મહેફિલની એજ હલચલ,
હજાર બેસે, હજાર ઉઠે, હજાર જાયે, હજાર આવે.
-’શયદા’

તારું ઠેકાણું મળ્યું છે જ્યારથી
હું મને શોધી રહ્યો છું ત્યારથી !
-અદી મિરઝા

તોડ દિવાલો ને બારી-બારણાં,
ખાતરી તો થાય કે આકાશ છે.
-છાયા ત્રિવેદી

તું યે કોરો ના રહે, જો તને લથબથ લખું,
આજ તોડું હદ બધી… બસ લખું, અનહદ લખું !
-’ઊર્મિ’ સાગર

તારી પાસે પહોંચવાની વાત કોરાણે રહી
હું જ મારાથી હજુ કેટલેય દૂર છું?
– કિશ્મત કુરેશી

તું જો આજે મારી સાથે જાગશે
ચાંદ થોડો ચાંદ જેવો લાગશે !
-અદી મિર્ઝા

ઢમ ઢમ બાજે ઢોલ નગારા યારો રમવા આવો
શેર ગઝલ સરવાણી મીઠી શબ્દે શબ્દે વહાવો
-સુમન અજમેરી

ઢળી છે સાંજ ને જાગી ઊઠી છે ઈચ્છાઓ,
હવે તો દોસ્તો ! સંભળાવ એના કિસ્સાઓ.
– ડૉ. રશીદ “મીર”

ઢળેલી સાંજના મળશે સરોવર ચોસલાંસોતું,
નવાનક્કોર શિલ્પો કોતરીને હાથમાં મૂકો.
-સંજય પંડ્યા

ઢાઈ અક્ષરમાં બધું ‘મીર’ સમેટાઈ ગયું,
હોય પાસે જો કોઈ વાત અજાણી લખજો.
– ડૉ. રશીદ “મીર”

ઢળતી સાંજનું વાછરડું ખોવાયું જાણે
એમ બાવરી ગાય ભાંભરે ધણની વચ્ચે
-આદિલ મન્સૂરી

ઢળતી રહે, વળતી રહે, હૅયા તરફ
શ્વાસો મહીં આ લાગણી ઓ સળવળે
-રમેશ પંડયા ‘આરસ’

ઢળી છે સાંજ ને જાગી ઊઠી છે ઈચ્છાઓ,
હવે તો દોસ્તો ! સંભળાવ એના કિસ્સાઓ
– ડૉ. રશીદ “મીર”

ઢુંકડુ કહેવાય તોય ગામ આઘું
લાગતું તારા વગરનું ગામ ઠાલું
-ગુણવંત ઉપાધ્યાય

ઢાંકી રહ્યું છે કોઇ પગેરું એ ઘાંસમાં
અલ્લડ અષાઢ ક્યાંક વગોવાય શક્ય છે
-ડો. પ્રફુલ્લ દેસઇ

ઢળેલી સાંજ, કેવળ આપણે, ઠંડી હવા, દરિયો
લગન ભીની, અગન ભીની, ને ભીના ટેરવા દરિયો
-વંચિત કુકમાવાળા

ડૂબતી સંધ્યા સમય બેવડ વળી
ખોઈ નાખ્યા કયાં દિવસ એ ગોતવા
-‘રસિક’ મેઘાણી

ડહાપણને રામ રામ, અમે ન્યાલ થઈ ગયા,
દીવાનગી સલામ ! અમે ન્યાલ થઈ ગયા.
– અદમ ટંકારવી

ડાળથી છૂટું પડેલું પાંદડું, તૂટી ગયેલા શ્વાસ, પીંછું,
ને સમયની આ તરડ સાંધી શકાતી હોત તો શું જોઇતું’તું?
-અનિલ ચાવડા

ડાળથી છૂટું પડેલું પાંદડું પૂછ્યાં કરે,
વૃક્ષ પરનો એક ટહુકો કેમ ભૂલાતો નથી ?
-ગૌરાંગ ઠાકર

ડગલેપગલે ભવમાં હું જેનાથી ભરમાયો હતો;
કોને જઈ કહેવું કે એ મારો જ પડછાયો હતો ?
– ‘શૂન્ય’ પાલનપુરી

ડુસ્કા ભરી ભરી અને થાકી ગયો છતાં
ભીતરમાં તારી યાદના પડઘા હું સાંભળું
‘રસિક’ મેઘાણી

ડૂબી ડૂબીને ડૂબવાનું શું માણસમાં ?
એક વેત ઊતરો ને ત્યાં તો તળિયાં આવે.
-અશરફ ડબાવાલા

ડગલું એક ભરી શકવાના હોંશ નથી,પણ
ડગલું એક ભરું તો તારાં ફળિયાં આવે.
-અશરફ ડબાવાલા

ડંખે છે દિલને કેવી એક અક્ષર કહ્યા વિના
રહી જાય છે જે વાત સમય પર કહ્યા વિના.
-મરીઝ

ડૂબી છે જઇને નાવ અમારી ક્ષિતિજ પર,
દુનિયાનો ખ્યાલ છે કે પાર ઊતરી ગઇ.
-મરીઝ

ખબર તો પડે મોતિઓ છે કે નહી
તુ સમંદરમા ડુબકી લગાવી તો જો
-જલન માતરી

ખારાશ આખ્ખા ગામની બાઝી પડી મને
દરિયો થવાની ખેવના કેવી નડી મને
ચંદ્રેશ મકવાણા ‘નારાજ’”

ખમી શકી ન વાટિકા તુષાર ભાર પણ અગર
કહીં સુમન ખરી ગયું, કહીં કળી ખરી ગઈ
-“રસિક” મેઘાણી

ખુદ ઉષા-સંધ્યા ન એનો દઈ શકી કોઈ જવાબ,
લોહીથી સૂરજનો પાલવ કેમ ખરડાયો હતો ?
– ‘શૂન્ય’ પાલનપુરી

ખુલ્લી ક્ષિતિજે ઝૂરતા સૂરજ સમો,
હું શૂન્યમાં બસ દૂર ઓગળતો રહ્યો.
– સુનીલ શાહ

ખાલી વફાની વાત કર્યાથી તો શું વળે ?
જો શ્વાસનો જ ના કશો એતબાર હોય તો !
-ગોવિંદ રા. ગઢવી

ખોઈ નાખ્યા જે દિવસો તડકામાં
છાંયડે ગોતવા નથી ગમતા
-“રસિક” મેઘાણી

ખેલ સમજણભર્યો જિંદગીનો
આંસુઓ લાવ કે ગીતને ગા.
-તથાગત પટેલ

ખજાનો ઉમંગોનો લૂંટાવવો છે હવે,
ભલે હોય થોડી ઘણી એ બચત લઈને આવ.
-સુધીર પટેલ

ખાંડાની ધારે ખેલ અને મોત સાથે બાથ
ત્યાં ચાલવું ધરાર, હજી યાદ છે મને
-“રસિક” મેઘાણી

આજ કેવી સવાર આવી છે
તારા માટે થયો ઉદાસ નથી
“રસિક” મેઘાણી

આપો હ્રદયમાં સ્થાન તો ખોટું નથી કશું,
માણસ તરીકે ‘ શૂન્ય ‘ મજાનો છે, નેક છે
-શુન્ય પાલનપુરી

એ ઓર વાત છે કે નથી મોહ નામનો,
બાકી તમારો ‘ શૂન્ય ‘ તો લાખોમાં એક છે
-શુન્ય પાલનપુરી

એને જીવનપરાગ હું અર્પણ કરી દઉં,
મૃત્યુ તો મારા દર્દનો એક જ ઈલાજ છે
-મનહરલાલ ચોકસી

ઉછાળા મારીને અમને ન પાછા વાળ ઓ સાગર
કિનારો આવશે તો ખુદ અમે તોફાન થઇ જાશું
-શેખાદમ અબુવાલા

એ જ લોકો થઇ શકે છે મહેફિલોની આબરૂ,
જેઓ વેરાનીને પણ સૂની જગા કહેતા નથી.
-“મરીઝ”

ઈશ્વર એ પછી સહેજમાં સમજાઈ જશે
એકવાર અમો પોતાને સમજી લઈએ
-“ઓજસ” પાલનપુરી

આયનામાં ડાઘ કાજલનો હતો,
બિંબ ખુદ મોહ્યાં હશે-ની યાદ છે.
-અહમદ મકરાણી

આ કિનારે મસ્ત મોજાં ગાય છે,
હે સમંદર, શું થયું એ નાવનું ?
-અહમદ મકરાણી

આપણા હાથે જ સંબંધો સતત ઊગતા હતા, ફાલ્યા હતા ને અંતમાં,
આપણા હાથે જ સગપણ તોડવાનું, એ જ તો વાંધો પડ્યો છે શ્વાસને
-શૈલેષ પંડ્યા ‘ભીનાશ’”

કોણે કહયું તને કદી આંબી નહીં શકું
રસ્તાના ખાડાં ટેકરા ખાળી નહીં શકું
-રસિક” મેઘાણી

કોઈ હમણાં આવશે, ભીંતો ભણકારાય
એક અમસ્તી શક્યતા, આખું ઘર પડઘાય
-જવાહર બક્ષી

કાયમી કોઈ દશા હોતી નથી,
બે-ઘડી ધુમ્મસ છવાતું હોય છે.
-રાકેશ હાંસલિયા”

ક્યાં બધે દિલથી જીવાતું હોય છે,
એટલે કાયમ થકાતું હોય છે.
-રાકેશ હાંસલિયા”

કેવો અનુપમ કેવો મનહર
તારો હસતો ચહેરો સુંદર
-રસિક” મેઘાણી

કેવા શુકનમાં પર્વતે આપી હશે વિદાય્
નિજ ઘરથી નીકળી નદી પાછી નથી વળી
-જલન માતરી

કેટલો નજીક છે આ દુરનો સંબંધ પણ,
હું રડું છું એકલો એ એકલા શરમાય છે.
-સૈફ’ પાલનપુરી

કાચ તૂટ્યો એક પથ્થરની કથા પૂરી થઈ,
શબ્દ પ્રગટ્યો એક અક્ષરની કથા પૂરી થઈ.
-ઉર્વીશ વસાવડા

કોણ તારી વાત સાંભળશે, હૃદય !
એક પથ્થર કોને કોને વાગશે !
– અદી મિરઝા

ક્યાં સુધી હું આભ સામે જોઈને બેસી રહું?
તું હવે વરસાવતો જો હોય તો વરસાવને.
-અનિલ ચાવડા